KREANek Bilbao Bizkaia Ur Partzuergoaren ura berrerabiltzea bultzatzeko plana idazteko laguntza teknikoa emateko kontratua sinatu du. Plan hori UrData Bizkaia I proiektuaren barruan dago, eta NEXT GENERATION EU berreskuratze- eta erresilientzia-mekanismotik datozen funtsekin finantzatzen da.
Plan horrek maiatzaren 11ko 4/2023 Errege Lege Dekretua beteko du. Horren arabera, 50.000 biztanletik gorako hiri-aglomerazioen horniduran, saneamenduan eta arazketan eskumena duten administrazio publikoek, 2028ko abenduaren 31 baino lehen, hiri-erabilerei lotutako uren berrerabilera sustatzeko planak aurkeztu beharko dituzte, Uren Legean aurreikusitakoak. Errege-dekretu hori argitaratu ondoren, urriaren 22ko 1085/2024 Errege Dekretua argitaratu zen, ura berrerabiltzeko Erregelamendua onartzen duena eta uraren kudeaketa arautzen duten zenbait errege-dekretu aldatzen dituena.
Bilbao Bizkaia Ur Partzuergoaren Planaren lanen irismena honako hau izango da: Galindoko HUA, Sestaon, Bilbo Handiari zerbitzua ematen diona (1.200.000 biztanle); Lamiarango HUA, Bermeon, 60.000 biztanlekoa; eta Arriandiko HUA, Iurretan, 86.000 biztanlekoa.
KREANek uraren berrerabilpenaren egungo egoeraren diagnostiko xehatua egingo du, dauden azpiegiturak, egungo erabilerak eta baliabide horren hedapen-potentziala aztertuz. Azterketa horretatik abiatuta, neurrien proposamena eta alternatiben ebaluazioa egingo ditu. Hori oinarri hartuta, birsortutako uraren erabilera sustatzeko estrategia-proposamen bat eta jarduera-plan bat garatuko ditu, epe luzerako bideragarritasuna eta iraunkortasuna bermatuz. Plan horretan, halaber, birsortutako uraren arriskua kudeatzeko planaren aurrerapen bat ere jasoko da.
Klima-aldaketak eta ur-eskasia gero eta handiagoak eta ekonomia zirkularrari buruzko kontzientzia gero eta handiagoak bultzatuta, Europar Batasunak plan bat eskatu die ur-kudeatzaileei, jakiteko zenbat ur berrerabil dezaketen eta zertarako erabil dezaketen.
Birsortutako ura hondakin-ur tratatua da, eta araztu egin da ezpurutasunak eta kutsatzaileak ezabatzeko, eta edateko ez diren erabilera berrietarako egokia da. Araudiak birsortutako urak izan dezakeen xedea ezartzen du, eta lau kategoria nagusi definitzen ditu: nekazaritza, industria-erabilera – hoztea, klimatizazioa, lurruna sortzea, instalazioak garbitzea –, parkeak ureztatzea eta hiri-garbiketa, eta beste batzuk, hala nola suteen aurkako sistemak, herri-lanak...
Esperientzia-eremu horretan, KREANek hondakin-urak berrerabiltzeko proiektuak egituratzeko eredu propioa du, ur horiek inguruko enpresen nekazaritza-, hiri- edo industria-erabilerarako behar dituzten komunitate hidrikoen sorreran oinarritua, URAGUA, ingeniaritzako eta egituraketako ezagutzak bateratzen dituen irtenbide berritzaile eta iraunkorra.
